Nýjar sóttvarnarreglur frá 3. nóvember

Nýjar sóttvarnarreglur voru kynntar um helgina. Það var léttir fyrir okkur í Tónskólanum að fá þær fréttir að hljóðfærakennslan fær að halda áfram í einkatímum. Fyrirkomulag hóptíma verður þó með sama sniði og undanfarnar vikur.

Í reglugerð heilbrigðisráðherra segir eftirfarandi um tónlistarskóla:

Tónlistarskólum er heimilt að sinna einstaklingskennslu með 2 metra nálægðartakmörkun milli starfsfólks og nemenda. Ekki er fleiri en tíu einstaklingum, þ.e. starfsfólki og nemendum, heimilt að vera í sama rými í einu, en gæta þarf að því að ekki verði um frekari blöndun hópa að ræða en í skólastarfi. Andlitsgrímur skulu notaðar í öllu starfi með nemendum þar sem því verður við komið. Foreldrar og aðstandendur skulu almennt ekki koma í tónlistarskóla nema brýna nauðsyn beri til. Aðrir en starfsmenn sem koma í tónlistarskóla, svo sem vegna vöruflutninga, skulu bera andlitsgrímur. Ráðstafanir skulu gerðar til að þrífa og sótthreinsa byggingar og búnað eftir hvern dag og milli einstaklinga og hópa í sama rými.

Það er ljóst að kennarar munu nota grímu þar sem því verður við komið. Varðandi grímunotkun nemenda gilda sömu reglur og hjá grunnskólunum þ.e. börn í 5. bekk og eldri munu nota grímu þar sem því verður við komið.

Við erum að vonum ánægð með að fá að hitta nemendur okkar en minnum á að enn gildir að ef minnstu einkenni láta á sér kræla þá heldur maður sig heima.

Breyting á kennslu í Tónskólanum til 19. október

Í samræmi við hertar sóttvarnaraðgerðir vegna Covid verða hóptímar ekki kenndir innan veggja Tónskólans til 19. október. Tónleikahaldi verður einnig frestað þar til eftir 19. okt. 

Allar tónfræðagreinar verða kenndar í fjarkennslu. Gert er ráð fyrir Zoom kennslu og/eða verkefnavinnu. Tónfræðagreinakennarar veita nánari upplýsingar um fyrirkomulag kennslunnar í hverjum hóp.

Einkatímar verða áfram kenndir í skólanum þó hóptímar fallir niður.

Hefðbundin kennsla hefst að nýju mánudaginn 4. maí.

Við fögnum því að frá 4. maí verður hefðbundin kennsla í
Tónskóla Sigursveins í samræmi við þær tilslakanir á
samkomubanninu sem taka þá gildi sbr. eftirfarandi upplýsingar á vef
mennta- og menningarmálaráðuneytisins :

„Takmarkanir á skólahaldi falla úr gildi frá og með mánudeginum 4.
maí. Þá verður starf leik- og grunnskóla með hefðbundnum hætti
og hvorki fjölda- né nálægðartakmörk munu gilda um nemendur á
leik- og grunnskólaaldri. Það á einnig við um frístundastarf barna
á leik- og grunnskólaaldri, s.s. íþróttaiðkun, æskulýðs- og
tómstundastarf og tónlistarnám.“

Einkatímar og hóptímar í hljóðfæraleik, forskóla, tónfræðagreinum og
samspili verða kenndir í skólanum en ítrustu kröfum um sóttvarnir
verður áfram fylgt og regla um tveggja metra fjarlægð á milli nemenda
eldri en 16 ára í heiðri höfð.

Því miður þarf að takmarka aðgengi foreldra að Tónskólanum í
samræmi við þær kröfur Reykjavíkurborgar að viðburðir í
skóla- og frístundastarfi séu án þátttöku foreldra og foreldrar
komi ekki inn í grunnskóla og frístundaheimili nema nauðsynlegt sé.
Foreldrar ungra Suzukibarna eru undanskildir þessari reglu þar sem
þeir eru virkir þátttakendur í tónlistarnáminu en reglu um tveggja metra
fjarlægð verður fylgt vel eftir.

Breyttir kennsluhættir í Tónskólanum út af Covid-19

Þrátt fyrir samkomubann sem tók gildi í dag eru hljóðfæratímar í Tónskólanum með óbreyttu sniði.

Óheimilt að fara inní grunnskóla þannig að þeim nemendum, sem hafa verið í spilatíma í skólanum sínum verður boðinn tími inní húsnæði Tónskólans í samráði við kennara og foreldra. Tímasetningar hjá þeim gætu breyst vegna þessa og biðlum við til foreldra að liðka fyrir því eins og hægt er.

Með samkomubanninu fellur hópkennsla í Tónskólanum niður. Það á við um forskóla, tónfræði, hljómsveitir, samspils- og suzukihópa. Við munum bjóða uppá fjarkennslu þar sem því verður við komið og verður það tilkynnt eins fljótt og mögulegt er. Allir tónleikar á vegum Tónskólans falla niður á meðan á samkomubanninu stendur.

Tónskólinn mun gæta ítrasta hreinlætis og verður húsnæði skólans þrifið og sótthreinsað daglega. Einnig verða hljómborð, hurðahúnar, lyftutakkar, handföng og aðrið snertifletir sótthreinsaðir reglulega yfir daginn.

Höldum gleðinni sem tónlistin gefur og njótum þess að spila á hljóðfærin okkar!

Tónskólinn og Covid-19

Þó samfélagið sé að talsverðu leyti undirlagt af umræðu um Covid-19 veiruna þá viljum við í Tónskólanum undirstrika að skólinn starfar eins og venjulega og við hvetjum nemendur til að stunda tónlistarnámið eftir bestu getu. Öll kennsla, þ.m.t. tónfræði og hljómsveitaræfingar, er óbreytt að svo stöddu. Við fylgjumst grannt með öllum tilkynningum og fyrirmælum frá Embætti landlæknis og Almannavarnardeild ríkislögreglustjóra.

Þeir nemendur sem finna fyrir flenskulíkum einkennum eru vinsamlegast beðnir um að mæta ekki Tónskólann.

https://www.landlaeknir.is/um-embaettid/greinar/grein/item38911/Spurningar-og-svor-vardandi-koronaveiruna-

Tónskólinn hefur komið fyrir sprittbrúsum í hverri kennslustofu og á salernum á Engjateigi og í Hraunbergi. Hafið samt í huga að handþvottur með sápu er besta forvörnin. Hér smá sjá myndband um handþvott: https://vimeo.com/151138613

Hvernig draga skal úr smithættu
– Hreinsa hendur með sápu og vatni eða handspritti
– Hósta og hnerra í krepptan olnboga eða í pappír
– Forðast náið samneyti við fólk sem er með hita, kvef eða flensueinkenni
– Gæta hreinlætis og forðast snertingu við augu, nef og munn
– Varast snertifleti á fjölförnum stöðum svo sem handrið, lyftuhnappa, snertiskjái, greiðsluposa og hurðarhúna
– Heilsa frekar með brosi en handabandi (eða faðmlagi)